bORDEAUX - GRAND CRU CLASSE 1855

Еден добар дел од нас, кога се во праашање француските вина, ги избегнува или затоа што не ги познава сите тие 'силни' термини истакнати на етикетата, па купувањето на таквото вино му делува како 'мачка во вреќа',  или пак уште полошо, чул, прочитал ама не дочитал, па често високите очекувања за скапо купеното вино со првата голтка се рушат како кула од карти заедно со сликaта за француските вина.
Да, Франција има извонредни вина. Нивната историја на светскиот вински врв е прилично долга. Неспорно е и дека не толку вредните француски вина ја користат таа предност при пенетрирање на пазарите. Меѓутоа она со што се соочуваат конзументите е неадекаватното ценовно позиционирање. Имено, доколку сте трговец со вино секогаш може да заработите 'евро плус' од не толку инволвираните конзументи на сметка на француските вина. Доволно е на етикетата да е истакнат некој познат регион, суб регион или пак неприметно името на дворецот да се разликува за некоја буква, а францускиот не ни е баш втор јазик, и ете ти олеснет џеб и искривена слика за француските вина.
Како и да е, ќе пробам низ неколку, колку што можам пократки текстови (знам дека се нема 'нерви' време за читање) да расклопам неколку клучни термини. Почнуваме со Бордо.
 
Вината од Бордо се генерално поделени во пет групи, каде секоја група понатаму се разгранува по длабочина. Една од тие пет групи е:

Гранд Кру Класификацијата од 1855 - Grads Crus Classification en 1855

Пред 160 и кусур години на барање на францускиот Цар Наполеон III, со цел да се истакнат најдобрите вина од Франција на Универзалната Изложба во Париз, 1855 година на 18 Април беше објавена листата на која беа рангирани најдобрите имоти или вински дворци-шатоа (châteaux).

Во оваа класификација се содржани 62 шатоа од суб-регионите лоцирани на левиот брег од реката Garonne, поточно од Medoc од кои само едно шато од Pessac-Leognan како и 27 шатоа за слатките вина од Sauternes i Barsac. Листата е рангирана во пет класи 'берби' (crus, growth)

• 5 Premiers Crus (first growth) - најценети од првата берба по редослед

                 - Chateau Lafite Rothschild
                 - Chateau Latour
                 - Chateaux Margoux
                 - Chateau Mouton Rothschild
                 - Chateau Haut-Brion

• 15 Deuxiemes Crus (Second Growth) - 15 шатоа од втора класа 'берба'
• 14 Troisiemes Crus (Third Growth) - 14 шатоа од трета класа 'берба'
• 10 Quatriemes Crus (Fourth Growth) - 10 шатоа од четврта класа 'берба'
• 18 Cinquiemes Crus (Fifth Growth) - 18 шатоа од пета класа 'берба'

Слатки Бордо Вина во склоп на Класификацијата од 1855

• 1 Premier Crus Superieur
• 11 Premiers Crus
• 15 Deuxiemes Crus

​
Вината на шатоата од првата класа Premier Cru се сметаат за најдобри, покрај тоа што сите пет класи се светски врвни вина, особено квалитетни и мошне скапи. 

Секако на шатоата од оваа класификација им е дозволено да произведуваат и други вина, меѓутоа тие не се дел од класификацијата и покрај тоа што шатото е влезено во листата од 1855, тоа често води до конфузија кај конзументите при нивниот избор.

Некој од шатоата носат име на суб-регионот, како што е прикажано во примерот со Шато Марго (Chateau Margaux), меѓутоа ќе најдете многу вина кај кои на етикетата е истакнат суб-регионот Марго (Margaux) а имаат далеку пониска цена. Името на суб-регионот не го гарантира квалитетот рангиран со класификацијата од 1855. 
Chateau Palmer во примерот подолу е дел од класификацијата 1855 меѓутоа како и останатите 13 шатоа припаѓа во групата од третата класа 'берба' Troisieme Cru (Third Growth) а се наоѓа во суб-регионот Margaux кој е истакнат на етикетата.

Со оваа класификација не се опфатени сите суб-региони како и сите вина во Бордо. Иако е сеуште во важност и ги означува елитните производители односно шатоа, многумина ја сметаат оваа класификација за застарена. Имено само две клучни но мали промени се направени во последните 160 години, за разлика од големите промени кои се случуваат со поседите на шатоата, нивното проширување кое секако влијае на квалитетот на виното. 
Ни остануваат уште четири групи врзани за поделбата и рангирањето на Бордо вината.

Се читаме !  
​